MUHANGA, 26 Nyakanga 2026 – Abana barenga 100, ababyeyi, abahoze ari abakinnyi, abatoza n’abafatanyabikorwa bahuriye muri Oratoire Don Bosco Kabgayi, mu Murenge wa Shyogwe, kwizihiza imyaka 15 ishize Don Bosco Kabgayi Football Training Center (DBKFTC) itangiye gufasha abana n’urubyiruko guteza imbere impano, uburere n’indangagaciro binyuze mu mupira w’amaguru.
Ibirori byabaye ku Cyumweru tariki ya 26 Nyakanga 2026, byari bifite insanganyamatsiko igira iti “Imyaka 15 yo Guteza Imbere Abana n’Urubyiruko Binyuze mu Mupira w’Amaguru,” bikaba byahurije hamwe abana, ababyeyi, alumni, abayobozi, abaterankunga n’inshuti za Centre mu kwizihiza urugendo rw’iri rerero rumaze imyaka 15 rutoza abana siporo ariko runabubakamo indangagaciro.
Kuva yashingwa mu 2011, Don Bosco Kabgayi Football Training Center yakomeje kwakira abana bafite imyaka kuva kuri itanu kuzamura, ibatoza mu byiciro bitandukanye birimo U8, U10, U13, U15 na U18. Buri cyiciro gihabwa imyitozo ihuje n’imyaka y’abana n’iterambere ryabo, hibandwa ku guteza imbere ubuhanga bwa ruhago, imyitwarire myiza, gukorera hamwe n’indangagaciro zishingiye kuri gahunda y’uburere bwa Don Bosco (Preventive System), yubakiye ku bwenge, ukwemera n’urukundo.
Umunsi watangijwe n’imikino y’abana bo mu byiciro bitandukanye, berekana iterambere mu buhanga bwo gukina, gukorera hamwe no kubahiriza amategeko y’umukino. Ku babyeyi bari bitabiriye, ibyo babonye byari ikimenyetso cy’uko imyitozo ya buri munsi itanga umusaruro urenze gutsinda imikino, ahubwo ikubaka imyitwarire n’icyizere cy’abana.
Ikindi cyaranze ibirori ni umukino wa gicuti wahuje abahoze ari abakinnyi b’iri rerero n’ikipe y’abatarengeje imyaka 18 (U18). Abakuru batsinze ibitego 4-2, ariko insinzi nyamukuru yari uguhuza ibisekuru bitandukanye byaciye muri DBKFTC no guha abakiri bato icyizere ko na bo bashobora kugera ku rwego rwo hejuru.
Mu butumwa bwabo, ababyeyi bashimye akazi gakorwa n’abatoza n’ubuyobozi bwa Centre, bavuga ko abana babo batigishwa umupira gusa ahubwo banatozwa ikinyabupfura, disipulini, kubahana no gukorera hamwe.
Mukeshingabire M. Josée, umwe mu babyeyi bafite abana bitoreza muri Centre, yavuze ko ibyishimo by’umubyeyi ari ukubona umwana we yishimye kandi atera imbere.
“Twabonye abana bishimye, bakundana kandi bumva abatoza babo. Umubyeyi utaje muri ibi birori yahombye. Ubu ndushaho kwemera ko abana bacu bari mu maboko meza.”
Yanagaragaje ko yishimiye kubona umwe mu bana be atsinda ibitego bitatu, ashimangira ko ibikorwa bitegurirwa abana bituma ababyeyi barushaho kwizera uburyo barerwamo.
Twizeyimana Emmanuel, umwe mu bashinze Centre akaba amaze imyaka 15 ari umutoza, yavuze ko urugendo rwa DBKFTC rwubakiye ku bwitange bwo kurera abana binyuze muri siporo.
“Udakunda abana ntiwamara imyaka 15 ubatoza. Mu ntangiriro byari bigoye kuko n’ababyeyi benshi batari basobanukiwe n’akamaro ka gahunda nk’iyi. Uyu munsi turashimira Abasaleziani ba Don Bosco baduhaye ikibuga, ibikoresho n’ubufasha budahwema, ndetse n’ababyeyi bakomeje kwizera ko umupira w’amaguru ushobora kubaka uburere n’indangagaciro.”
Mu myaka 15 ishize, Don Bosco Kabgayi Football Training Center yabaye ishuri ry’ubuzima ku bana benshi, ibafasha kuvumbura impano no kubategurira ejo hazaza. Uretse kwiga umupira, abana batozwa gukunda umurimo, kubaha abandi, gufata inshingano no gukorera hamwe.
Umusaruro w’iri rerero ugaragarira no ku bahoze baryigamo. Kugeza ubu, abakinnyi barindwi bakina nk’ababigize umwuga mu cyiciro cya mbere mu Rwanda, abandi bakina mu cyiciro cya kabiri n’icya gatatu, mu gihe babiri bakina umupira w’amaguru nk’ababigize umwuga hanze y’u Rwanda.
Nshimiyimana Emmanuel uzwi nka Kabage, myugariro wa Rayon Sports utabashije kwitabira ibirori kubera imikino ya CECAFA, yoherereje ubutumwa bagenzi be abashimira ubwitange bagize, abasaba gukomeza kuba intangarugero muri sosiyete no gukomeza kuba hafi y’irerero ryabafashije kugera aho bageze.
Ubwitabire bw’abana barenga 100, uruhare rw’ababyeyi, kugaruka kwa abahanyuze n’ubufatanye bw’abafatanyabikorwa byashimangiye ko Don Bosco Kabgayi Football Training Center ikomeje kuba imwe mu ngero zerekana uburyo siporo ishobora gukoreshwa nk’igikoresho cyo guteza imbere uburezi, kubaka indangagaciro no gutegura abayobozi b’ejo hazaza.
Mu gihe yizihiza imyaka 15 imaze ishinzwe, DBKFTC ikomeje gutanga ubutumwa bw’uko umupira w’amaguru utarangirira ku kibuga gusa, ahubwo ushobora guhindura ubuzima bw’abana, gukomeza imiryango no gutanga umusanzu mu iterambere rirambye ry’u Rwanda ,icyerekezo cyatumye iri rerero rikomeza kuba icyitegererezo mu guteza imbere siporo ishingiye ku burere n’indangagaciro.
👉 Reba amafoto yose hano:
Photo Gallery – Don Bosco Kabgayi FTC 15 Years
